Kosbaarder as Korale is ‘n kortverhaalbundel wat geskryf is deur verskeie skrywers, en sluit verhale in wat die krag, moed, en deursettingsvermoë van vroue vier. Die verhale wissel van persoonlike oorwinnings en tweede kanse tot liefde en familie, en weerspieël die uiteenlopende ervarings en uitdagings wat vroue daagliks in die gesig staar.
Hierdie verhale van vroue wat onophoudelik werk om die lewens van diegene om hulle te verbeter, sal die leser inspireer en diep raak.

Die Malherbe Skrywers het hulself weereens oortref met hierdie spogbundel. 19 unieke Afrikaanse stories wat jou emosies laat wipplank ry. In die bundel is daar ook ’n les of twee te leer. Soos die storie van Ma Kietie. Sy hou die Malan-huishouding se leisels in groot, sterk geoefende hande vas. Haar tong slaan soos ʼn sweep as sy hierdie Malantjies dril. Maar bewaar die een wat met haar kinders mors. Dit het die skoolhoof op die harde manier geleer. Maar skaf gerus hierdie bundel aan as julle meer wil weet wat alles hierbinne gebeur.

Kortverhale is al vir baie jare as ‘n goeie tydverdryf beskou. Met Keur van verhale bring ons weereens goeie kortverhale na die leser, want ‘n goeie storie raak nie oud nie en moet vir die nageslag bewaar word.

Elke storie of gedig in hierdie bundel is geïnspireer deur die een of ander liedjie. Waarom nou juis ’n liedjie? Want die lewe is ’n lied, en elke lied vertel sy eie storie.
Musiek is oral om ons. Dit is nie bloot net woorde met ’n wysie nie, dit vertroos en inspireer jou, bepaal soms jou gemoedstemming, laat jou goed voel. Soms maak dit jou ook hartseer, herinner jou aan dit wat eens was.
Jou gunstelingliedjie verplaas jou na ’n spesifieke plek, gebeurtenis of ’n bepaalde tyd in jou lewe. Musiek is die ritme van ons bestaan.
Ria Richards

Arondshoop is ’n plattelandse dorpie geleë iewers tussen Êrens en Nêrens, waar almal vir almal ken. Elkeen van die inwoners het ’n storie. Daar is oom Kallie Klikbek en sy vrou Sara, en soos wat lesers van sy naam kan aflei, is oom Kallie maar lief om stories stertjies aan te las. So beland hy ampertjies in die moeilikheid toe hy by Rika flikflooi vir ’n karnaaitjie.

Dit is ‘n bundel kortverhale, deursprinkel met nostalgiese stories en ‘n móét-lees vir almal, maar veral vir Afrikaners en dié wat hou van goeie Afrikaans.

’n Paar onvoorsiene dinge gebeur met Raphael Zirk se sirkus tydens hulle besoek op die klein dorpie: Kierangspruit. Kom beleef die sirkus deur die oë van skrywers.