Margaret Barnard

Margaret Barnard, beter bekend as Magie, woon in Otjiwarongo, Namibië. Sy skryf met ’n passie wat al van laerskool af in haar leef — veral gedigte. Hoewel sy aanvanklik gesê het sy wil nie liefdesverhale skryf nie, het sy onlangs begin eksperimenteer met spanningsverhale en kinderboeke, en werk tans aan ’n liefdesverhaal getiteld Harte van Hout.

Magie het grootgeword in Swakopmund, ’n plek wat ’n groot invloed op haar skryfstyl en inspirasie het. Die see, die kaai, die sonsondergange en haar herinneringe van Brandberg Wes Myn en Uis by haar ouers het ’n diep indruk op haar gedigte en verhale gemaak.

Haar nuutste werk is ’n digbundel met ’n versameling van haar beste gedigte tot dusver. Sy publiseer eksklusief by Malherbe Uitgewers, en erken die rol wat hierdie uitgewers in haar skryfloopbaan speel.

Magie beskou haar lesers as ’n soort familie, omdat skryf ’n intieme uitdrukking van wie sy is. Buiten skryf is sy ’n toegewyde graad een juffrou, lees sy graag, geniet kuns en spandeer waardevolle tyd saam met haar gesin en vyf katte.

Haar skryfproses begin met ’n raamwerk en deeglike navorsing, waarna sy die storie “inkleur” met haar kreatiewe verbeelding. Sy put inspirasie uit mense se lewensverhale en haar eie drome. Vir plesier lees sy graag spanningsverhale, met Irma Joubert as een van haar gunsteling skrywers.

Indien sy met haar lesers kon praat, sou sy hulle graag bedank vir hul ondersteuning en die pad saam met haar loop.