Mirna Boeson wil net een ding hê: ‘n gewone lewe. Vir tien jaar het sy haar towerkragte onderdruk, hard gewerk en alles gedoen om haar donker verlede agter te laat. Maar daar is een probleem: haar opstandige tweelingsuster, Nalene, leef steeds in haar kop – uitgesproke, impulsief en altyd gereed om ‘n bietjie chaos te saai. Wanneer Mirna se sorgvuldig opgeboude wêreld begin verbrokkel, word sy gedwing om weer die magie te gebruik wat sy so lank probeer vermy het. Skielik beland sy op die radar van die geheimsinnige Juan Cloete, terwyl ou vyande uit die skadu’s begin beweeg. Met gevaar wat al nader kruip en geheime wat nie langer versteek kan bly nie, sal Mirna moet besluit wie sy werklik is: die gewone vrou wat sy probeer wees, of die heks wat die noodlot bestem het sy moet word. Towerspel is ‘n betowerende verhaal oor liefde, lojaliteit, opoffering en die krag om jouself te aanvaar – selfs die dele wat jy die hardste probeer wegsteek.