Na ‘n liefdelose huwelik, jare lange stryd teen oorgewig en die dood van haar gewese man, besluit Zinia om “genesing” van al die hartseer van die afgelope jare, in Mosselbaai te gaan soek. Sy verhuis van die bekende om ‘n nuwe lewe te begin. Mosselbaai was nog altyd haar hartsplek en wat dit makliker maak is die feit dat haar jarelange vriendin daar woon. Met haar beradingsagtergrond, besluit Zinia om ‘n Beradingspraktyk te open, maar wil eers vestig en goed uitrus.
Die noodlot gooi egter haar planne omver en Zinia beland in die hospitaal nadat sy deur Wessel Gerber se groot hond omgespring word, en sy haar arm sleg breek. Daar is dadelik vuurwerke tussen die twee en Zinia is geskok toe sy uitvind dat hy eintlik die leraar is van dieselfde gemeente wat sy bywoon.
Sal die geliefde ds. Wessel Zinia se hart weer in die liefde kan laat glo?

Wanneer dokter Chantey Bruwer in die rustige Karoo-dorpie Kroondal aankom, is dit met die hoop om haar hartseer en die skaduwees van haar verlede agter te laat. Haar nuwe pos by die hospitaal bied ’n kans om oor te begin – ver van die seer wat sy in Kaapstad agterlaat.

Maar Kroondal is nie so stil soos dit lyk nie. Van haar eerste dag af bots sy met dokter Berto van Schalkwyk – aantreklik, uiters bekwaam, en oortuig dat sy nie in sy wêreld inpas nie. Tog is daar ’n vonk tussen hulle wat albei sukkel om te ignoreer. Terwyl sy probeer om haar plek in die gemeenskap te vind, begin Chantey besef dat die verlede haar dalk nie so maklik gaan los nie… en dat liefde soms op die mees onverwagte plekke skuil.

Kan sy regtig weer vertrou? En sal sy uiteindelik vind waarna sy regtig soek – ware geluk?

In die Italiaanse dorp Grosseto skuil ‘n doolhof van leuens, moord, en geheime wat generasies lank bewaar is. Ben Prins, ‘n Suid-Afrikaanse geheimediensagent met ‘n donker verlede, reis na Italië om ‘n netwerk van misdaad en korrupsie te ontbloot – een wat diep in die invloedryke Esposito-familie gewortel is. Tussen buffelboerdery en mozzarella-fabrieke lê ‘n wêreld van dwelms, mensehandel en verraad. Amedeo Esposito, gerespekteerde prokureur en geheime misdaadbaas, hou sy gesin en sy skuldige dade in balans – tot die dag wat sy seun met ‘n onthulling kom wat hul wêreld in beroering bring. Intussen worstel Igor, ‘n jong Rus met ‘n stukkende verlede, tussen skuld en begeerte in ‘n wêreld waar liefde, mag en morele grense vervaag. In hierdie meesleurende spanningsverhaal bots pligsbesef en passie, waarheid en lojaliteit – en niemand sal ongeskonde hieruit kom nie.

Dit klink soos ‘n sprokie: Alet, ‘n weduwee, en Bernhard, sjarmant en aantreklik, ontmoet oor die internet en raak smoorverlief op mekaar. Alhoewel Alet oop kaarte met Bernhard speel oor haar lewe en haar kinders, kan dieselfde nie van Bernhard gesê word nie.
Die droom spat aan skerwe wanneer Bernhard in ‘n koma beland en Alet tot haar verbystering agterkom dat hul verhouding op leuens gebou is. As sy geweet het van die dinge wat Bernhard vir haar weggesteek het, sou sy nooit in ‘n verhouding met hom betrokke geraak het nie.
Wat gaan Alet maak met die nuwe inligting? Sy kan nie vir Bernhard konfronteer nie want hy is steeds in ‘n koma. Maar sy maak ‘n ander plan…
‘n Verhaal oor die slaggate van internet-verhoudings.