Elsa de Waal dra al jare lank aan ’n geheim – die storie van haar man, Henk, die arm bywonerseun uit Suidwes wat deur swaarkry, vernedering en oorlog moes veg om sy plek in die lewe te vind. Sy liefde vir Elsa was sy redding, maar ook sy ondergang. Nou, aan die einde van haar lewe, weet Elsa sy kan nie sterf sonder om die waarheid oor Henk te vertel nie – oor hoe verkeerde keuses sy lewe gekos het. Wanneer die jong skrywer Jasper Muller uiteindelik instem om haar dagboeke te lees, word hy onherroeplik ingetrek in Henk en Elsa se lewens – twee mense vasgevang tussen liefde en plig, skuld en vergifnis.

Op die kronkelpaaie van die lewe leer Sylvia Tredoux dat elke afdraai, hoe pynlik ook al, ’n doel dra. Van ’n gebroke
huis vol streng reëls tot ’n liefde wat jare lank in stilte wag, word haar pad deur hartseer, verlange en hoop
gekenmerk. Haar eerste liefde, Niel Bester, bly soos ’n lig in die verte — selfs wanneer die lewe haar deur donker
tonnels stuur. Ná teleurstellings, ’n tragiese ongeluk en die verliese wat sy skaars kan dra, bly Sylvia se geloof in
liefde en herstel onwrikbaar. In Bloemhof, tussen mense wat haar weer leer glo, word sy gekonfronteer met die spore van
haar verlede — en die moontlikheid van ’n tweede kans. Die Highway van die lewe is ’n roerende verhaal van drome,
struikelblokke en die ewige soeke na vrede en aanvaarding.