Die sewentienjarige Charlotte is baie geïnteresseerd in medies, veral die anatomie van die mens. Sy het ’n passie om mense te genees, maar daar is soveel wat teen haar tel. Vir vroue in die laat 1800’s is ’n beroep in die manswêreld taboe, haar droom om medies te studeer sal altyd net ’n droom bly. In Charlotte se eie woorde: “’n Droom bly net ’n droom as jy niks daaraan doen nie. Maar ’n vrou met ’n droom maak ’n droom realiteit as sy ander vroue agter haar het met dieselfde droom. As jy regtig wil, sal jy! Al moet jy die broek van jou vyand aantrek en sy geur aan jou smeer. Jy moet soos hy word en sy agenda verander om vir jou te werk.”

Die Lewe is geneig om tenminste één keer in ’n mens se lewe, vir jou ’n klap te gee. Jou van balans af te probeer ruk, en jou wêreld onderstebo te keer. Maar vir Twanette Greyling, het die lewe ’n hele paar klappe uitgedeel. Die vraag is net: Wat gaan sy daaromtrent doen? Twanette is ’n pragtige blondekop dokter by 2 Militêre Hospitaal in die mooie Kaap. Sy kry haar eerste klap toe sy haar pens en pootjies in ’n huwelik begewe. Min wetende dat dit al op die eerste dag sou begin skipbreuk lei. ’n Huwelik wat haar menswees en siel letterlik sou opvreet. In Leiden, Nederland, begin lente, maar in Twanette se hart is dit steeds winter.
Gaan Twanette ooit weer ’n normale lewe lei na die ernstige trauma wat haar wil knak.
Gaan sy bly treur oor wat was, óf wat kon wees?
Dan, op ’n mooi lentedag, kry sy ’n bos tulpe met ’n nota daarby. Van wie af is die bos pragtige tulpe, en wat sou in die nota staan…?

Marlé is ’n boekvraat en sy vind haar werk as bibliotekaresse bevredigend. Toe sy die dag ’n plek benodig om een van die skrywers se boekbekendstelling te hou, kom haar jarelange vriend, Pieter, tot haar redding. Pieter se verloofde het hom voor die kansel gelos, wat hom sku maak om weer by ’n vrou betrokke te raak, maar die man besit nog al die jare haar hart, al sien hy haar nie eens raak nie. Pieter is lank reeds bewus van die mooie Marlé wat allerhande ongehoorde gevoelens in hom aanwakker, maar hy is bang vir seerkry en dit maak hom skrikkerig om sy hart aan haar toe te vertrou. Daarom maak hy aan Marlé ’n voorstel wat hy dink hulle albei kan baat: Friends with benefits… Hy reken as hy fisiek vervuld is, sal die ewige smagting na Marlé dalk stop.
Marlé aanvaar sy simpel voorstel. Friends with benefits is dalk die enigste manier hoe sy naby genoeg aan Pieter kan kom om hom te wys wat hy mis. Haar vriendin, Klaradyn, se waarskuwing dat so ’n eensydige liefdesverhouding net hartseer tot gevolg gaan hê, val op dowe ore. Marlé plaas haar hart op die spel om Pieter te oortuig dat alle vroue nie daarop uit is om hom seer te maak nie. Maar die hart laat hom nie voorskryf nie. Pieter se plan om nie emosioneel by Marlé betrokke te raak nie, kom hom duur te staan toe hy amper te laat besef dat liefde tóg lekker kan wees.