Jannus du Plessis se lewe is op die rand van ‘n afgrond – sy ma is sterwend, en ‘n geheim wat dekades lank begrawe was, wag om onthul te word. Wanneer hy na sy tuisdorp terugkeer, word hy in ’n wêreld van onthou en ontdekking ingetrek. ’n Kroeg met ‘n geheimsinnige gedenkplaat, ‘n man met fletsblou oë wat te veel weet, en ‘n verlede wat anders lyk as wat hy geglo het.
Wie was sy pa regtig? En hoekom het sy ma nooit van sy ware familie gepraat nie? Namate die waarheid ontrafel, moet Jannus die brokke van sy verlede bymekaarsit – selfs al beteken dit dat hy sy hele identiteit moet heroorweeg.
’n Verhaal van familie, verlore drome en ‘n man wat na sy eie waarheid moet soek.

Rupert Murdoch is ʼn moordenaar. ʼn Sluipmoordenaar in ’n donker wêreld waar opdragte gegee word sonder vrae, en skuldgevoelens geen plek het nie. Wanneer Murdoch nie moor nie, is hy Brian McKenna wat op ondenkbare wyses poog om die
bloed van sy hande te was. Ná jare van moord en verraad erf hy onverwags ’n plaas in Limpopo – ’n stukkie grond waar stilte en sonlig hom moontlik ’n nuwe begin kan bied. Op Wolwefontein wag meer as net stilte. Hanri, die vrou wat onwetend sy donker wêreld binnewandel, word sy veilige hawe na wie hy telkens terugkeer. Maar vrede is ’n luukse wat min mense hom gun. Die verlede, in die gedaante van die beeldskone, maar dodelike, Suzanne volg hom soos ’n skaduwee. Murdoch word die teiken van die stelsel wat hom geskep het. Dié keer slaan die moordenaar terug. En wanneer moord, wraak en liefde begin saamvloei, moet hy besluit: kan ’n moorman ooit in die lig leef? Moorman is ’n meedoënlose, spanningsvolle roman wat die grense tussen skuld en geregtigheid, passie en gevaar, ondersoek. Dit is nie vir sensitiewe lesers nie – maar vir dié wat dapper genoeg is om in die donker te kyk.