Die sewentienjarige Charlotte is baie geïnteresseerd in medies, veral die anatomie van die mens. Sy het ’n passie om mense te genees, maar daar is soveel wat teen haar tel. Vir vroue in die laat 1800’s is ’n beroep in die manswêreld taboe, haar droom om medies te studeer sal altyd net ’n droom bly. In Charlotte se eie woorde: “’n Droom bly net ’n droom as jy niks daaraan doen nie. Maar ’n vrou met ’n droom maak ’n droom realiteit as sy ander vroue agter haar het met dieselfde droom. As jy regtig wil, sal jy! Al moet jy die broek van jou vyand aantrek en sy geur aan jou smeer. Jy moet soos hy word en sy agenda verander om vir jou te werk.”

Christine kry ‘n groot kontrak as argitek by ‘n hospitaal se aanbouings by die kankerafdeling. Sy is opgewonde oor die nuwe projek, want dit kan haar naam in die bedryf bevestig. So leer ken sy vir Albert, een van die hartspesialiste by die einste hospitaal. Hoe meer tyd hulle saam spandeer, hoe harder val sy vir hom. Tot die noodlot haar tref en sy met leukemie gediagnoseer word. Haar geloof wankel en sy sluit Albert uit, om sy gevoelens te spaar. Maar toe sy ‘n anonieme skenking vir beenmurg kry en dit haar lewe red, besef sy dat haar geloof in haar Hemelse Vader se liefde haar deurgedra het. Sy het egter nie rekening gehou met Albert se gevoelens vir haar nie en hy stap die pad saam met haar. Totdat Lukas, Albert se broer, ‘n vlieg in die salf word en hulle geluk in die weegskaal hang.

In die skadu van Pretoria se stasie, lê Salvokop – ’n nederige buurt waar die dae stadig verbygaan en drome soms te groot lyk vir die klein huise met hul rooi sinkdakke. Hier woon Janetta Scholtz, ’n jong meisie met vlamrooi hare en grasgroen oë, saam met haar trotse vader, Koos. Vir haar is Salvokop die enigste wêreld wat sy ken – eenvoudig, maar vol liefde en herinneringe.Maar wanneer die musiek van ’n vreemde land die stad vul, en die aantreklike Italiaanse tenoor Mario Minetti haar pad kruis, word Janetta se eenvoudige bestaan op sy kop gekeer.
Kan ’n meisie van Salvokop se rooi stoepe ooit haar plek vind tussen die glans en liggies van ’n groter wêreld? Salvokop is ’n verhaal van hoop, liefde en drome wat sterker is as armoede – en die onverwagte paaie waarlangs die hart sy eie lied sing.

Die Lewe is geneig om tenminste één keer in ’n mens se lewe, vir jou ’n klap te gee. Jou van balans af te probeer ruk, en jou wêreld onderstebo te keer. Maar vir Twanette Greyling, het die lewe ’n hele paar klappe uitgedeel. Die vraag is net: Wat gaan sy daaromtrent doen? Twanette is ’n pragtige blondekop dokter by 2 Militêre Hospitaal in die mooie Kaap. Sy kry haar eerste klap toe sy haar pens en pootjies in ’n huwelik begewe. Min wetende dat dit al op die eerste dag sou begin skipbreuk lei. ’n Huwelik wat haar menswees en siel letterlik sou opvreet. In Leiden, Nederland, begin lente, maar in Twanette se hart is dit steeds winter.
Gaan Twanette ooit weer ’n normale lewe lei na die ernstige trauma wat haar wil knak.
Gaan sy bly treur oor wat was, óf wat kon wees?
Dan, op ’n mooi lentedag, kry sy ’n bos tulpe met ’n nota daarby. Van wie af is die bos pragtige tulpe, en wat sou in die nota staan…?