“Slange! Hoekom moes dit juis slange wees? Asof dit nie erg genoeg is om in die visier van ’n reeksmoordenaar te wees nie…”
ʼn Rustelose siel dwaal steeds in die ou kasteel, waar Altus du Preez, ‘n skrywer op soek na inspirasie, ‘n stil gastehuis kies om te ontsnap van die alledaagse. Maar die geheime van die ou Maritz-familie weef donker skaduwees oor sy verblyf. Onheilspellende figure, spoke wat verborge juwele soek, en ‘n verhaal van begrawe skatte ontvou voor sy oë. Met elke dag wat verbygaan, groei Altus se obsessie om die waarheid te ontbloot, terwyl hy toenemend vasgevang raak in die dodelike lokvalle van die kasteel se grusame verlede.
Dit is ‘n verhaal van mistieke kragte, geheimsinnige sterftes en die ewige gesoek na verlossing.

Bushy McDougal sit vas in die net van ’n gewetenlose Namibiese dwelm- en diamantsmokkelaar, Blanche Mouton. Wanneer hy met ’n sak vol diamante vlug, verdwyn hy spoorloos. Sy vriend Jack du Toit gaan op soek, en ’n gevaarlike reis deur Namibië en Namaqualand begin. ’n Neergestorte helikopter, dooie mans in ’n motor, en ’n wrede wraakplan vorm die agtergrond van hierdie spanningsverhaal. Wat het van Bushy, die diamante, en BB se miljoene geword?

Die Dis is ’n aksiebelaaide verhaal wat die leser meevoer in ’n wêreld van spanning, verlies en wraak. Die storie kombineer die rou emosies van ‘n gesinsdrama met die intrige van internasionale politieke manipulasie. Die gebruik van Romeinse mitologie om karakters en plekke te benoem, dra by tot die diep simboliek en sfeer van die verhaal. Die protagonis, Carl Scheepers, worstel met sy persoonlike verlies terwyl hy te midde van vyande en bondgenote ’n gevaarlike pad stap om sy seun te red en geregtigheid te laat seëvier.

Die Maan Huil Bloed is ’n spanningsverhaal vol intrige en vertel die verhaal van Trudie wat ’n erfgenaam is van ’n man wat haar tweede pa is, waarvan sy nie eers geweet het nie. Sy erf ’n wildsplaas aan die voet van die Soutpansberge.
Net na die besoek van die prokureur ontvang Trudie ’n bos rose en haar vriendin Rika sterf net daarna. Is dit toevallig?