Na ‘n liefdelose huwelik, jare lange stryd teen oorgewig en die dood van haar gewese man, besluit Zinia om “genesing” van al die hartseer van die afgelope jare, in Mosselbaai te gaan soek. Sy verhuis van die bekende om ‘n nuwe lewe te begin. Mosselbaai was nog altyd haar hartsplek en wat dit makliker maak is die feit dat haar jarelange vriendin daar woon. Met haar beradingsagtergrond, besluit Zinia om ‘n Beradingspraktyk te open, maar wil eers vestig en goed uitrus.
Die noodlot gooi egter haar planne omver en Zinia beland in die hospitaal nadat sy deur Wessel Gerber se groot hond omgespring word, en sy haar arm sleg breek. Daar is dadelik vuurwerke tussen die twee en Zinia is geskok toe sy uitvind dat hy eintlik die leraar is van dieselfde gemeente wat sy bywoon.
Sal die geliefde ds. Wessel Zinia se hart weer in die liefde kan laat glo?

Kan Lente ooit vir Christo oortuig dat die ouderdomsgaping tussen hulle nie saak maak nie, of gaan Lente moet teruggaan Karoo toe en van Christo vergeet? ’n Koerantfoto onthul geheime wat die deurslag gee in die besluit wat Lente moet neem; een wat haar lewe totaal sal ontwrig.

Andreea Bartonelli word in die vroeg 1900’s in Floraans gebore met ’n besondere musiektalent, wat deur haar vader, Bruno, self ’n komponis en musiekonderwyser van vroeg af ontgin word. Sy is wel nie ’n kind wat wil begin praat nie en haar moeder, Carmen, se verwerping en kwetsende woorde mag dalk ’n groot bydrae daartoe hê.Wanneer sy ses is, verlaat haar moeder hulle sonder om haar eers te groet. Haar vader en goewernante, Emma, word haar alles. Om haar aandag van die traumatiese gebeurtenis af te lei, reël Bruno haar eerste optrede nêrens anders nie as in die La Scala, Milaan, Italië.

Toe joernalis Eloise Roos na Gansbaai gestuur word om gerugte van perlemoensmokkelary rondom die magtige sakeman Justin Hudson te ondersoek, verwag sy ’n gevaarlike storie — nie ’n man soos Matthew Hudson nie. Onder die dekmantel van ’n biografieprojek kry Eloise toegang tot die Hudson-huis, waar luuksheid, invloed en geheime agter elke glimlag skuil. Hoe langer sy daar bly, hoe moeiliker raak dit om waarheid van voorgee te onderskei. Want alles dui daarop dat iets donker onder die oppervlak broei. Terwyl haar hart haar in een rigting trek en haar instinkte in ’n ander, besef Eloise dat sy nie net ’n storie ondersoek nie — sy stap reguit in die middel van ’n web van leuens, gevaar en verborgenheid in. Wanneer maskers begin val, is die waarheid gevaarliker as wat sy ooit kon dink … en die prys daarvan dalk haar hart.