Vars uit Oesbekistan neem jou op ’n reis na die hart van Sentraal-Asië — deur die oë van ’n Suid-Afrikaanse musiekonderwyser wat in die onstuimige dae van die Covid-pandemie sy tasse gepak en ’n nuwe lewe in Oesbekistan aangepak het. In hierdie bundel vol humor, heimwee en verwondering deel Emile Minnie sy unieke perspektief op die Oesbek kultuur. ’n Boek vir elkeen wat al ooit gewonder het hoe dit voel om alles agter te laat, en die onbekende aan te durf.

Emile Minnie gesels oor die Oesbek-taal en kultuur:

Woordeskat voorlesing:

Klokkies en Granaatjies is ’n geurige, ryk versameling mengelmoeskardoes van kortverhale wat diep menslik is – vol vrae, genade en geloof, wat die fyn krake in mense se harte oopvou.  Jy gaan hier mense ontmoet wat twyfel, wonder, weer probeer. Vroue wat sukkel om hul plek te vind. Oumas wat rook en raad gee. Kinders wat hoop bring. En ’n paar karakters wat dalk te na aan die werklikheid voel om net fiksie te wees.

Mari Ströh se stem is eerlik en eg, dikwels met ’n tikkie stoutigheid, altyd met ’n stewige hartklop van geloof, en ’n diep menslikheid wat by jou gaan bly lank nadat jy die boek neergesit het.

Dis stories vir wanneer jy verlang na die eenvoud van gister, toe die lewe nog ’n bietjie stadiger was, toe ’n beker koffie en ’n stukkie koek op die stoep nog genesing gebring het. Elke verhaal fluister: jy is nie alleen nie. En dalk, net dalk, is dit die mooiste waarheid van alles.

In Vrees as Metgesel neem die skrywers jou op ’n spanningsvolle reis deur stegies van misdaad, raaisels en die onbekende. Hierdie keur van 38 kortverhale delf in die donker dieptes van die menslike psige – waar skuld, geheime en wraak soos skaduwees teen die mure fluister.
Van dorpsplekke met bloedbevlekte verlede tot tydreise vol misterie, van geheime biblioteke tot moord onder die silwer maan, is elke verhaal ‘n unieke speurtog wat lesers aan die raai hou tot die laaste sin.
In Vrees as Metgesel word jy saam met ’n reeks speurders, gewone mense én geheimsinnige figure ingesleep in stories waar niks is soos dit lyk nie.