Kom ervaar spanning, avontuur, misterie, misdaad, liefde, humor en sommer baie meer, saam met al die verskillende karakters in die Prosa Collage; “DIE ANDER MAN.”

Hierdie prag-kortverhaalbundel bied die kieskeurigste leser so ’n ietsie van alles onder die son. Humor, nostalgie, romanse, aksie, ens…

Elke leser bly maar op soek na goeie stories as teenmiddel teen die donker wat ons dikwels wil insluk, en na ‘n ontsnappingsroete, om vir ‘n oomblik te vergeet van tyd.
Afrikaanse stories is tydloos en jy kan verdwaal in die leefwêreld van fiksie.

Toe Maryna Joubert voor haar graad nege klas staan, trek een seun, Chris Greyling, haar aandag. Na haar seer egskeiding met Anton en die dood van hulle seun, Deon, het sy besluit om in Pretoria ’n nuwe toekoms te begin maar met Chris wat haar so baie aan haar oorlede seun herinner, is dit moeilik om aan te beweeg. Toe Chris egter hulp nodig het met ekstra wiskundelesse, kan sy haarself nie help nie en bied hulp aan. Hoe kan sy met ’n spook kompeteer vir sy hart? Sy is so bang om weer te misluk en weer seer te kry.

Arondshoop is ’n plattelandse dorpie geleë iewers tussen Êrens en Nêrens, waar almal vir almal ken. Elkeen van die inwoners het ’n storie. Daar is oom Kallie Klikbek en sy vrou Sara, en soos wat lesers van sy naam kan aflei, is oom Kallie maar lief om stories stertjies aan te las. So beland hy ampertjies in die moeilikheid toe hy by Rika flikflooi vir ’n karnaaitjie.

Met elke verhaal neem die  Skrywers die leser saam op ’n verbeeldingsvlug deur die denkbeeldige plattelandse dorpie, geleë iewers tussen Êrens en Nêrens, waar almal mekaar ken.

Daardie nag het egter vêrreikende gevolge en Talita besef dat sy uit daardie vreemdeling se pad moet bly. Al wat sy van hom weet is dat hy skatryk is en dat hy klein Bertus van haar af sal kan wegneem. Talita is nie bereid om die kans te waag nie. Niemand gaan Bertus ooit van haar af wegneem nie.
Die vraag is of Jacques Streicher handjies gevou gaan sit toe hy besef dat hy ’n kind het.

Dit voel vir Alex asof ‘n trein haar tref. Haar wind word van agteraf uitgeslaan terwyl ‘n growwe hand haar mond styf toedruk. Sy ruik ‘n mengsel van alkohol en sigarette tussen vrot asem-teue, maar die besef dat dit wat nou aan’t gebeur is dring nie tot haar deur nie.
Alexandra maak laatmiddag haar oë in die Louis Pasteur Hospitaal oop. Alles aan haar pyn. Binne en buite haar liggaam. Haar hand reik stadig na daar waar dit die seerste is; die sagte plekkie wat ‘n vrou bêre vir haar geliefde…