‘n Droom vir Marilaine is die verhaal van ‘n vrou in haar laat vyftiger jare. Haar lewe was nooit net maanskyn en rose nie. Sy moes van vroeg af leer hoe om op haar eie voete te staan.
Marilaine word dan skielik afbetaal by haar werk. Sy is onseker oor wat die toekoms vir haar inhou. Hierdie skielike omwenteling laat haar twyfel in haarself. Gelukkig is dit van korte duur. Haar goeie vriendin kom met ‘n voorstel wat haar hele lewe ten goede omverwerp.
Sy leer van vooraf wat dit is om op die Here te vertrou. Sy pluk dan ook die vrugte van haar geloof.
‘n Roman wat by die alledaagse vrou, aanklank sal vind.

Greti Strauss groei op ’n Vrystaatse plaas op, maar droom daarvan om ’n LLB-graad aan die Universiteit van Pretoria te behaal. Sy werk hard om geld te spaar en ontvang onverwags finansiële hulp wat haar droom moontlik maak. Op pad na Pretoria beland sy in ’n vreemde situasie wat later voordelig blyk te wees. Sy beleef sukses, vriendskap en liefde in die stad, maar wanneer tragedie toeslaan, besef sy selfs die “Midas touch” kan haar nie teen hartseer beskerm nie.

Adri word op Langverwacht gebore, onbewus van die draaie wat haar lewe sou neem. ’n Verkeerde keuse lei haar na die Karoo, vasgevang in ’n toksiese huwelik met George, wie se donker kant haar en haar kinders se lewens bedreig. Ná vyftien jaar vlug sy na Bredasdorp om nuut te begin. Deur geloof en deursettingsvermoë bou sy ’n veilige lewe vir haar gesin. Jare later bring George se dood onverwags nuwe onrus en geheimenisse wat ou wonde oopkrap.

Trane van ’n Kind.
Ria Steyn het gedink haar ware identiteit kan sy versteek agter vuil mure vol graffiti, totdat daar ’n moord gepleeg word in die woonstel langsaan. Wie is Ria Steyn en wat is haar verbintenis met die agtien meisies wat in die George, Hermanus, Kleinmond en omliggende gebiede onverklaarbaar vermis geraak het?
Verwyte oor Verlore Tyd
Net ’n paar dae terug het Santie voor die oop graf gestaan. Haar man en kinders half agter haar. Hulle het die vrou begrawe wat haar in die lewe gebring het en wat sy haar hele lewe lank nie wou erken as haar ma nie.Nou sit sy in die prokureur se kantoor en kan nie glo wat sy hoor nie. Die brief in haar ma se handskrif keer haar hele lewe op sy kop.

Dit klink soos ‘n sprokie: Alet, ‘n weduwee, en Bernhard, sjarmant en aantreklik, ontmoet oor die internet en raak smoorverlief op mekaar. Alhoewel Alet oop kaarte met Bernhard speel oor haar lewe en haar kinders, kan dieselfde nie van Bernhard gesê word nie.
Die droom spat aan skerwe wanneer Bernhard in ‘n koma beland en Alet tot haar verbystering agterkom dat hul verhouding op leuens gebou is. As sy geweet het van die dinge wat Bernhard vir haar weggesteek het, sou sy nooit in ‘n verhouding met hom betrokke geraak het nie.
Wat gaan Alet maak met die nuwe inligting? Sy kan nie vir Bernhard konfronteer nie want hy is steeds in ‘n koma. Maar sy maak ‘n ander plan…
‘n Verhaal oor die slaggate van internet-verhoudings.