Toe Kamilla se pa met Julius se ma trou, kry sy onverwags ’n “broer” wat later haar tweelingbroer blyk te wees. Ná hul pa se dood ontdek hulle hul ware herkoms en besluit om hul afsydige oupa, die Markies D’Almera, in Portugal te konfronteer. Daar ontmoet Kamilla die aantreklike Francesco, wat haar as veearts aanstel by die kasteel. Maar geheime en bedrog wag. Kan sy die Markies se duister verlede ontbloot – of is sommige waarhede té ongelooflik om te glo?

Kan Lente ooit vir Christo oortuig dat die ouderdomsgaping tussen hulle nie saak maak nie, of gaan Lente moet teruggaan Karoo toe en van Christo vergeet? ’n Koerantfoto onthul geheime wat die deurslag gee in die besluit wat Lente moet neem; een wat haar lewe totaal sal ontwrig.

Sanja Sandrucci se uittrede uit die modebedryf kom as ’n groot skok vir die wêreld, veral vir Alessandro Pisano wat haar uitsonderlike talent raakgesien het en haar klerereeks as ’n onderafdeling van sy modehuis vervaardig en bemark. Sonder enige verduideliking roep sy Milaan vaarwel en keur terug na Pretoria.

Andreea Bartonelli word in die vroeg 1900’s in Floraans gebore met ’n besondere musiektalent, wat deur haar vader, Bruno, self ’n komponis en musiekonderwyser van vroeg af ontgin word. Sy is wel nie ’n kind wat wil begin praat nie en haar moeder, Carmen, se verwerping en kwetsende woorde mag dalk ’n groot bydrae daartoe hê.Wanneer sy ses is, verlaat haar moeder hulle sonder om haar eers te groet. Haar vader en goewernante, Emma, word haar alles. Om haar aandag van die traumatiese gebeurtenis af te lei, reël Bruno haar eerste optrede nêrens anders nie as in die La Scala, Milaan, Italië.